隱世「鐵板燒」美食～大埔 <燚 ITSUMÉI>

去到餐廳門口要撳門鈴入去，之前以為係咪lunch 唔營業，因為好少餐廳會咁樣關門，當店員熱情地開門時入內都幾驚喜，鐵板燒烤板上有一個藍色魚缸，氣氛係好似居酒屋的感覺。

我同老公叫左兩Set $588嘅入門廚師發辦套餐，及兩杯啤酒🥂送鐵板燒一流！

⭐️入門廚師發辦套餐 $588

沙律

好似分子料理咁，沙律醬變成泡泡，再將新鮮嘅蔬菜及菠蘿一齊食，蔬果新鮮，食落開胃又特別。

鐵板海鮮 -扇貝及象拔蚌

配上黑松露油及松露鹽及柚子味泡泡

首先象拔蚌入口充滿鮮味，咬開爆汁，啖啖充滿幸福感！配埋清新蘆筍，多重口感。而扇貝就以黑松露醬及牛油調味，扇貝鮮味又有松露香，不得了！

豬扒及雞扒

擺盤有一粒以小蘿蔔製作成的菇仔，都好可愛，店員話食完肉之後食菇仔清味蕾。旁邊有幾滴牛油醬，可以做調味配肉食，而豬扒及雞扒分別有特製嘅醬汁配搭，例如豬扒就配菠蘿汁，酸酸甜甜，令豬肉味香而不臊，雞扒就以欖菜汁作配搭，雞肉嫩而燒得香，令人回味。

炒飯

用鐵板燒炒成嘅飯，有一隻彈牙大蝦，飯炒到粒粒分明，食完覺得飽飽啦，不過仲有甜品先係完美：雪糕 食完就perfect 啦！

整個餐都有驚喜，店員有細心講解每一道菜式，而且擺盤亦都好精緻，果然係大埔隱世美食。